ខេត្តព្រះសីហនុ៖ មានករណីហឹង្សាបណ្តាលឲ្យមនុស្សស្លាប់ម្នាក់ និងរបួសម្នាក់ បានកើតឡើងនៅថ្ងៃទី ២២ ខែធ្នូ ឆ្នាំ ២០២៤ នៅចំណុចដីកោង ភូមិចំណោទរាម ឃុំបិតត្រាំង ស្រុកព្រៃនប់ ខេត្តព្រះសីហនុ។

នៅវេលាម៉ោងប្រមាណ៧ និង១៥នាទីយប់ ជម្លោះបានផ្ទុះឡើងបន្ទាប់ពីឈ្មោះ សុខ វីន ហៅម៉ាប់ ភេទប្រុស អាយុ២៨ឆ្នាំ សង្ស័យស្រវឹងស្រា បានចាប់ដៃ និងជើងកូនស្រីរបស់ អាន គឹមហឿន កណ្តាលផ្លូវ។ បុរសជាឪពុកអាយុ៤៥ឆ្នាំ ជាឆ្មាំដីបានទទួលដំណឹងពីហេតុការណ៍នេះ ហើយដោយកំហឹងបានចាកចេញពីផ្ទះដោយមានអ្នកភូមិម្នាក់ប្រដាប់ដោយដំបងឈើដើម្បីតទល់នឹងស្ថានភាព។

ជម្លោះកាន់តែតានតឹងនៅពេលដែលលោក អាន គឹមហឿន និងបក្ខពួក ឈ្មោះ សឿន ដារ៉ូ អាយុ ៣២ឆ្នាំ ជាជាងជួសជុលរថយន្ត បានវាយលោក សុខ វីន និងអ្នកឈរក្បែរ ឈ្មោះ មាន ផាឃឹម អាយុ២៦ឆ្នាំ ជាបុគ្គលដឹកជញ្ជូនឲ្យក្រុមហ៊ុន E Gets។ ឈ្នោះ សុខ វិន រងរបួសធ្ងន់ដោយសារវាយចំកញ្ចឹងក និងខ្នង បណ្តាលឲ្យស្លាប់ពេលបញ្ជូនទៅសង្គ្រោះនៅមណ្ឌលសុខភាពឃុំរាម។ ឈ្មោះ មាន ផាឃឹម បានរងរបួសដោយការវាយស្រាលចំក្បាល និងខ្នង។

ក្រោយពេលកើតហេតុ កម្លាំងអធិការដ្ឋាននគរបាលស្រុកព្រៃនប់ និងប៉ុស្តិ៍នគរបាលរដ្ឋបាលបិតត្រាំង បានចុះទៅដល់កន្លែងកើតហេតុភ្លាមៗ ដោយបានឃាត់ខ្លួនជនសង្ស័យ ព្រមទាំងដកហូតឈើចំនួន៣ដុំ និងទូរស័ព្ទដៃ១គ្រឿង។

បច្ចុប្បន្នជនសង្ស័យទាំង២នាក់ ត្រូវបានឃាត់ខ្លួននៅអធិការដ្ឋាននគរបាលស្រុកព្រៃនប់ និងកំពុងធ្វើការសាកសួរ។ ការស៊ើបអង្កេតលើកាលៈទេសៈជុំវិញព្រឹត្តិការណ៍សោកនាដកម្មនេះកំពុងបន្ត៕